الفيزيائي الرياضي بول ديراك
الثلاثاء - 26 نوفمبر 2024 - الساعة 12:56 ص بتوقيت العاصمة عدن
" عدن سيتي " المعلمة جهاد : متابعات
الفيزيائي الرياضي بول ديراك
بول أدريان موريس ديراك (بول ديراك)، كُلما تعمقت فى الفيزياء ستعُجب بهذا الرجل أكثر فأكثر... أغلبنا يعرف نيوتن وآينشتاين أكتر أتنين مشهوريين بين عامة الناس ولكن خليني أقولك أن ديراك هو أكتر فيزيائي عبقرية على مدار تاريخ الفيزياء كله وده مش مبالغة لأن أعماله الثورية وأفكاره الأستثنائية وشخصيته المُبهرة تخليه فى تصنيف لوحده عن باقي الفيزيائيين.
•ديراك درس هندسة كهربية ولكنه كان بيحب الرياضيات وفعلاً راح جامعة كامبريدچ عشان يدرس الرياضيات وفى أحد اللحظات الزمنية وهو موجود مع مُشرف الدكتوراه بتاعه رالف فاولر يجيلهم بحث من هايزينبيرج بيوصف فيه ميكانيكا جديدة تمامًا غير الميكانيكا الكلاسيكية اللي نعرفها وهى ميكانيكا الكم ولكن بصيغة المصفوفات (Matrices) (أحد الصيغ الرياضية) وكان هايزينبيرج باعت البحث ده لفاولر عشان يشوف الكلام ده ممكن يبقى صح ولا لأ، اللي فيما بعد عُرفت بأسم (Heisenberg picture of quantum mechanics)، ولكن ديراك بدأ بحث من وقتها عن النوع الجديد ده من الميكانيكا ومع الوقت قدر يحط نظرية أعم من نظرية ميكانيكا الكم واللي أظهرت أن صيغة المصفوفات بتاعة هايزينبيرج وصيغة الدوال الموجية لشرودنجر الأتنين صورتين لعملة واحده وقدر يوحد معاهم النسبية الخاصة فى معادلة واحده أسمها معادلة ديراك (Dirac Equation) اللي محدش يعرف يعملها غيره هو بس لأنه بيتفوق على باقي الفيزيائيين فى جانب الرياضيات وبيعرف يربط كويس أوي الرياضيات ببعضها على عكس باقي العلماء اللي بيحتاجوا أعمال رياضيين يبنوا عليها ولو مش موجوده مش هايعرفوا يصيغوا أفكارهم على سبيل المثال لو فضاء منكوفيسكي وتحويلات لورنتز مش موجوده مكنش آينشتاين هايعرف يصيغ النسبية على عكس ديراك اللي كان بيصنع رياضيات عشان يوصّف بيها أفكاره وأدخل مفاهيم رياضية جديدة للفيزياء لحد دلوقتي هى مسار للفيزيائيين بيمشوا عليه.
•ديراك أستنتج وجود المادة المضادة واللي كان أستنتاج رياضي بحت ولكننا رصدناها فى الحقيقة، كمان ديراك أدخل فكرة بحر ديراك (Dirac Sea) اللي كان فكرة جديدة من نوعها تمامًا ونظرية المجال الكمومي (Quantum Field Theory) اللي هى حجر الأساس للنظريات الفيزيائية الحالية وبتفسر ظواهر كتيرة بتحصل على المستوى الكمومي واللي أنا مُعجب بيها جدًا على المستوى الشخصي.
•ديراك كان هادي جدًا ومتواضع جدًا وكلامه قليل جدًا، شوفتله لقاء نادر جدًا فى معهد جونتجن فى ألمانيا سنة ١٩٨٢م بيتكلم فيه عن النسبية وميكانيكا الكم، حقيقي الواحد شاف فيه معاني جميلة جدًا من الهدوء والأستماع والكلام على أد الحاجة، تشعر أن تعمقه فى الطبيعة خلاه فى أبعاد تانية غيرنا، وكان بيبعد عن الشهرة والكلام ده بل متواضع جدًا وعايش يتعلم ويخدم العلم وبس.
من.قول